太子手記：祈連活o係港大捍衛聯匯
港元聯繫匯率喺上個禮拜五度過二十七歲生日，聯匯之父祈連活咁多年嚟對呢個親生仔嘅信心，一啲都冇動搖過，尋日佢喺港大講TALK，一如所料繼續撐聯匯，仲上晒身咁向班大學生唱好聯匯。
尋日太子特登去港大做咗半日學生，現場仲見到港交所（00388）兩位唔同年代嘅前行政總裁，袁天凡同埋周文耀，連埋港鐵（00066）主席錢果豐，排排坐乖乖咁坐喺台下「聽書」。
近期香港同好多新興市場一樣，飽受熱錢流入將資產價格炒到癲嘅煎熬，香港最慘係冇得用利率呢種工具嚟遏抑通脹，於是乎又引發聯匯存廢嘅討論。
幾十年後先講掛鈎人幣
討論就梗係冇問題喇，但去到結論，祈連活就一定唔贊成脫鈎。佢話，雖然美國同香港嘅經濟周期唔多一致，但香港嘅生意以美元結算為主，掛鈎令商家對港元信心大好多；至於同人民幣掛鈎又得唔得呢，佢話過多幾十年先講啦。咁精彩嘅分析，聽到在場逾200位聽眾拍晒手掌。
有人就問佢，點睇美國推出嘅第二輪量化寬鬆政策（QE2）對通脹嘅影響，佢忽然好勞氣咁話，QE2唔會令通脹出現，好似日本咁，當低利率都搞唔起經濟時，日本政府都係用呢招，不過結果都係通縮。
聯匯之父祈連活喺港大演講，繼續撐聯匯。