市場徐想：泡沫市 勿輕言做淡
成日都同人講，千祈唔好估牛市幾時爆破，否則自己先畀人爆破，筆者一直睇好二○一一年嘅股市，除咗基本因素，梗係加埋心理學，以簡單不過嘅思考睇股市，喺呢個時候大家又再一次瘋狂，IPO搏命吸水，供股不停咁嚟，市好唔做，等幾時啊？
喺呢個高位，買唔買股票，其實好睇你嘅忍功，成日都話資產泡沫，實情係資產價格開始脫離真實價格。不過，大家又願意「摸高」繼續高買高賣，都係嗰一句，睇位千祈唔好太盡。
依家係泡沫市，千祈唔好「輕言做淡」，我哋其實係股市中嘅微塵，想乘風破浪，都係要跟住班「大哥」行，千祈唔好當自己係股神。等市回番再嚟過，唔好畀23,000點嚇驚咗，風險唔可以承受太多嘅就買安碩A50中國（02823），不過記住買ETF唔可以太心急。另外，新股四環（00460）同友邦（01299）都可以追蹤。