股海實戰： 中航科工 迎接大升浪

巨型新股友邦（01299）昨日開始招股，理所當然會吸走市場部分資金，故見昨日港股走勢略為轉弱，恒指全日低位23,467點，收報23,469點，跌288點，大市成交983億元。睇走勢，短線恒指向上受制於24,000點關，向下22,500至22,800點有較大支持，但只要交投維持暢旺，大可炒股唔炒市。

炒家已摸清特區住屋政策底蘊，再度出擊，故見近期各區二手交投反彈。政府唔敢做太多嘢，怕一棒打沉樓市，其意唔難理解。

阿莊就認為，若然政府肯定熱錢流入已令樓市出現泡沫，只要向公眾明確表示：自住毋須急於入市，投機客高追風險自負，並繼續做好本分，落實增加市場供應，咁即使他日樓市爆煲，接火棒者亦與人無尤。

入市注碼宜遞減

事實上，如今無論係政府、用家，抑或炒家，最感難以觸摸嘅係息口走勢，只要維持超低息率，新興市場將繼續面對大量熱錢湧入嘅問題。

阿莊亦覺呢轉港股升勢有啲「虛」，但熱錢真金白銀入市掃貨，即使係睇基本因素做嘢嘅傳統基金，都要硬住頭皮入市掃貨，免得年尾基金表現大落後，小投資者唔趁旺市炒出炒入又好似對唔住自己，只能奉勸一句，若然指數繼續挾高，入市注碼宜逐步減少，總之要做好風險管理。

回說阿莊嘅投資組合，手持嘅中航科工（02357）股價向上一直受制於4元關，本月上旬曾掉頭踩落3.43元，之後便告「V」形反彈，昨日曾高見4.17元，收報3.96元，升3.1%，成交1.14億元。

重組成功有「錢」途

近幾年中航科工積極進行資產重組，成績有目共睹，阿莊喺呢度亦唔係第一次提及，今年三月上車之後，股價曾經跌穿3元都唔肯走，都係靠呢個信念支持。

睇近日中航科工嘅股價表現，「V」形反彈唔排除係開快車前嘅震倉活動，喺預期明年公司業績將更全面反映重組成效之下，盈利能力復甦勢必引發市場進行重估，若然本季股價能確認成功突破4元大關，嚟緊將可迎接大升浪，屆時可睇位增倉，搭啱順風車，目標回報坐望五成，向下3.2元水平支持不容有失。

順帶一提，阿莊於上周買入嘅保利協鑫（03800）宣布，今年首三季度累計生產多晶硅1.21萬公噸，同比增長1.8倍，第三季度生產成本約為每公斤25.4美元，而九月底成本更進一步下降至23.8美元，第三季度光伏業務平均毛利率為44%，較首三季度之平均毛利率高出5個百分點，公司嘅經營表現符合預期，可以安心繼續持貨。

戰報

重慶鋼鐵（01053）

阿莊本月十一日指重慶鋼鐵可追落後，果然無令人失望，昨日高見2.52元，較推介當日低位2.26元，升11.5%。

國泰君安（01788）

錢進上周三推介國泰君安，指其具炒作空間，昨日創上市新高5.66元，較上周三低位4.37元，勁升29.5%。