股市大旺勢掀換樓潮

施政報告後，樓市大體都已經明朗化；政府唔敢復建居屋，亦都係一早已預計得到，所以當市場都冇乜期望嘅時候，其效應自然亦唔係咁大。至於新推出嘅「置安心」計劃，其實又係資助房屋嘅變奏，而且到推行時樓市會係咩光景又係未知之數，所以根本講唔上對依家嘅樓市會帶嚟咩影響。

不過，政府唔畀內地客買樓作投資移民，就令到二手樓市嘅內地睇樓客喺早兩日突然間「縮」咗唔少。班高官可能好樂於睇到呢個情況，但係，如果諗住咁樣係幫個樓市降溫的話，Paul少真係想勸佢哋唔好再咁naive。內地客睇樓減少咗，皆因佢哋多數都唔熟悉香港嘅民情，所以究竟市場會點樣去解讀整份施政報告，個市又會畀咩反應出嚟，佢哋都冇乜經驗，所以寧願睇吓本地買家嘅走向先至再作安排。但係喺持續低息環境下，加上熱錢流入，資產價格上升始終都係大趨勢，樓價升勢放緩，並唔代表已經轉勢。

內地人買樓志在投資

至於施政報告唔畀買樓嚟投資移民，究竟有幾大作用呢？其實政府自己講嘅數據，都已經畀咗市場一啲提示：佢哋話買樓嚟做投資移民嘅成交，佔整體市場唔夠1%，但近呢年，好多大型屋苑或者係新落成屋苑，內地買家隨時佔咗一成或以上，雖然兩個數字唔可以直接比較，但多少都反映到，其實喺主流市場買緊貨嘅內地客，可能大部分都唔係志在投資移民，而係志在投資，所以政策對樓市嘅影響，實在好有限。

不過，Paul少亦都相信，樓市嘅成交唔會喺一兩個禮拜裏面，就即刻坐火箭咁衝上嚟；反而近排股市大升，就可能為未來兩三個月嘅樓市表現醞釀突破。Paul少預計，好多用家，當喺股市賺到錢之後，好自然就進一步upgrade自己嘅家居生活，最直接當然就係住大啲，住豪啲，享受之餘又有保本升值作用。但記住，呢啲並唔係純粹嘅投資策略，因為買家着眼點都會放喺物業適唔適合自己，係唔係真係比之前住得更舒服。

買樓upgrade着重享受

Paul少所講嘅升浪，並唔係甚麼投資者「套股換樓」嗰回事。老實講，依家股市重現大牛市，投資者又點會貿貿然抽走用嚟炒股嘅資金，轉去炒樓吖。呢一轉嘅換樓upgrade潮，一定會係「享受」為先，完全係用家心態大於一切；至於物業嘅價值會唔會極速「爆上」，唔係呢一刻最concren嘅事。