市場徐想：華創 食正內需國策
第十七屆五中全會今日喺北京「開波」，中央高管同領導又要度計制訂「十二．五規劃」。大家都估，阿爺為咗減少經濟發展對基建項目同出口嘅依賴，將會全力催谷內需發展。
內需股唔使講梗係又「乘風破浪」，如果大家想一齊滑浪，可特別留意內地嘅超市龍頭股份華潤創業（00291）。華創雖然貴為內地超市股大佬之一，但佢並冇故步自封，不甘「食老本」而又冇其他嘅增長。時下女性消費喺化妝同美容嘅使費有愈來愈勁嘅趨勢，華創管理層以旗下華潤零售集團之名，斥資5億元，用喺拓展本港同內地嘅健康美容零售業務，並建立自家品牌VivoPlus。除此之外，華創早前亦完成了對著名連鎖咖啡店Pacific Coffee的收購，期望可以喺內地嘅龐大市場大展拳腳。
圖表上，華創股價自早前創一年新高後開始下調，喺32元水平企穩。有興趣嘅，可以伺機喺呢個水平附近吸納。繼續追蹤！