Fundman睇市：興達 增長潛力未反映

承接美、日、中國股市繼續攀升，港股昨日高開後，所遇阻力有限，到下午歐洲股市高開，好友得以再下一城，恒指以接近全日高位收市，報23,852點，升394點，錢多的情況是金融海嘯之後罕見，大市總成交1,385億元，創十七個月紀錄，有趣的是，成交額比前日多出近27%或者接近300億元，但係沽空總金額77.1億元，只係升3.9%，可見輸到怯的淡友，在指數逼近兩萬四前夕反而無咁勇。

今次熱賭美國聯儲局再開印鈔機，推出二輪量化寬鬆（QE2），即時踩冧美元，美匯指數短短六個星期內貶值7.8%。而採用聯繫匯率的港元，就陪美元齊齊插水，處身高通脹及低息狹縫之間的香港，熱錢流入資產及投資市場變得無法避免，但到底今次港股升浪可以維持幾耐？實在好難講，要睇美元跌勢幾時肯放緩，甚至出現反彈才行。不過，俗語話buy on rumor sell on fact（傳聞時買入，證實時沽出），就短炒者而言，目前分析師大多預期十一月二至三日，聯儲局會在議息會議中順便公布QE2，減番幾日緩衝，今次股市升浪隨時炒到25至29日的一個星期，仲有成十個交易日，日日兩三百點，真係唔敢想像恒指到時會企响邊個水平！

渣打成功打動股民

渣打（02888）果然無令人失望，股價彈升9.8元，至236.8元，不單止重返供股消息公布前水平，收市計仲創埋海嘯後新高，今時的確唔同往日，熊市中供股集資人見人怕，可是今日股市牛氣沖天，熱錢缺乏出路，渣打伸手集資，擴大新興市場發展，故事動聽，故輕易打動芬佬同股民，心甘情願獻上荷包。

今年汽車股表現一枝獨秀，不過普遍估值已經唔平，合理啲嘅東風（00489）及吉利（00175），一○年估值介乎十五至十六倍，概念性較高的像華晨（01114），一一年講緊二十倍樓上，短期的吸引力已然下降。在一眾汽車周邊工業股尋寶，史提芬認為低估值的興達國際（01899）最具瞄頭，在股市衝高之下，不失為炒落後之選。即使唔理公司早前投資1億元（人民幣．下同）發展太陽能電池板業務，是否純粹趕新能源概念潮流，單係睇興達的本業，其實也頗為吸引。

間接受惠車市興旺

目前公司是內地最大子午輪胎鋼簾線生產商，產品主要是由鍍銅鋼絲結成的簾線，作用是加強輪胎胎壁強度，並把輪胎固定在輪圈上，屬於製造汽車輪胎的必需品。目前，中國十大輪胎生產商都是興達的客戶，簡單而言，內地經濟好，路面上的汽車愈多，興達的生意亦會愈好，雖然有別於汽車股，但興達算是間接投資內地汽車業的股份。

興達純利由○五年的1.16億元拾級而上，至○九年升至5.47億元，四年間累升了371%。證券界預測，興達今、明兩年純利將進一步攀升至8.1億元及10.3億元，相當於48.1%及27.1%的增長，但一○年市盈率只得十一倍，高增長並無充分在估值上反映，搵落後的汽車周邊股，尋日剛破位兼創新高的興達，短期值得捧場。