股海實戰：哈動有勢開轉快車

呢個十月對於股民嚟講真係十分之特別，事關不但沒有「股災」出現，反而見到股市升勢停不了。昨日恒指繼續反覆走高，大市成交增至1,385億元，難怪港交所（00388）頭也不回，昨日再創五十二周新高179.9元，八月底以來累計升幅近50%，升勢之強，阿莊亦大嘆走寶﹗

近日觀察股海，發現十月以來唔少炒家唔信個市會繼續上，升穿23,000點便大手加淡倉，結果呢個禮拜可謂痛不欲生。唔經唔覺，恒指已經升到上23,800點水平，再睇大市交投大增，動力充沛，相信唔少持倉較低嘅基金，亦要硬着頭皮入市追貨，免得年尾要交白卷。正所謂「升市莫估頂」，淡友亦實在冇得守。

後市續呈大漲小回

事實上，阿莊早已經講過，咁嘅大升市只有順勢而為，唔信嘅話寧可唔做唔錯，都唔好倒自己米逆市而行。短線恒指喺24,000點或會有回吐，但除非外圍股市衝高後出現較大幅嘅調整，否則港股未有大跌之虞，後市將繼續「大漲小回」。

昨日升市，滙控（00005）亦應記一功，事關股價終於成功突破250日線，高位見84.2元，收報84元，升2.6%。好在阿莊亦唔輸蝕，喺本周一買入1萬股滙控。由於股價才剛破位，照計仲可以入市追貨。

阿莊持倉嘅中國燃氣（00384）及中國南車（01766）昨日分別升9.6%及6.2%。本周三推介嘅保利協鑫（03800）亦見異動，昨日中午前遂按平均價每股2.36元追入30萬股，估唔到尾市掃高至2.49元，收報2.47元，升6.47%，成交3.89億元。論走勢，今轉料可反覆上試2.7至2.8元水平。

仙股熱炒場面墟冚

昨日大市另一個特點，係多咗資金入市追落後，內銀股便為一例，中信銀行（00998）升4.7%、工商銀行（01398）升4.96%、交通銀行（03328）升3.3%。二、三線股表現同樣出色，就如昨日位居升幅榜首嘅蒙古礦業（01166），單日成交金額可以高達10億元，仙股有如此墟冚嘅場面，真係近年鮮見﹗

H股之中，阿莊留意咗隻哈爾濱動力（01133），昨日以大成交突破五十二周高位，全日高見10.94元，收報10.62元，升6.5%，成交近1.8億元。事緣「十二．五規劃」討論不斷升溫，風電、核電等環保能源勢成主題之一。今日起一連數天喺北京召開嘅五中全會，內容或再次強調加快發展新能源產業，相關股類頓成炒家目標，類似哈動呢類環保能源設備製造商，亦自然唔愁炒作藉口。

論短線走勢，哈動股價再現突破，可謂靚絕。強者愈強，博再開轉快車，試衝12元關，穿9.9元止蝕。

戰報

TCL通訊（02618）

錢進上周四指TCL通訊（02618）勢頭唔錯，昨日突破五十二周高位見5.65元，較推介日低位5.05元，上升11.8%。

中石化（00386）

阿莊周二睇好中石化（00386），認為股價將再次起動，昨日高位見7.57元，相對周二低位6.86元，升幅達10.3%。