Fundman睇市：贏錢有前科 渣打供得過

近期港股對壞消息的抵抗力，的確強到無人有，短短幾日之間，先係上周五美國失望的就業數據，再來周初內地放風人行加存款準備金率0.5%，到尋日內地出口數字同樣差過市場預期。

內部因素方面，特首的施政報告，針對熾熱樓市的調節性政策，也比市場預期更多，唯獨市場一於好少理，恒指尋日由高開低走，最後拗腰挾到海嘯後新高收市，升335點，報23,457點，十月期指大高水124點之外，大市成交更係今年第四次突破千億界線，達1,092億元。

尋日飯局，話題自然落响新鮮熱辣嘅施政報告身上，老友笑言近期市民仇富心重，內地人買樓搞移民的通道暫時關上，乃預期之內，但無一刀切限制其他途徑嘅投資移民，包括用650萬買股票，照樣獲特區身份證一張，最高興嘅應該係今年生意麻麻嘅本地證券行。

本來，一年透過投資移民流入的資金不過幾十億，等於全年樓宇成交額1%，或者港股一日成交額5%左右，以上講法純粹搞笑，殊不知下午真係見有證券行的施政報告檢討提到這一點，認為對股市有利，證明近日港股或多或少已經有啲「起泡」，不論好消息、抑或壞消息都炒一餐之外，如今連唔好唔壞嘅，亦都一樣炒咗至算。

趁市旺，公司都出來向股東伸手，比較意外的是，尋日早市停牌的渣打（02888）宣布了供股計劃，以8供1比例，每股作價1,280便士，或者156.82港元，扣除集資成本後籌集32.58億英鎊，大約相當於400億港元。由於有消息指唔少基金有持貨上限，或者未能供股，渣打午後復牌股價一度跌至223元，然而跌幅之後逐步收窄，最後跌3元，收報227元。

捧場客賺200%利潤

供股後股價堅挺的表現，不期然令人想起○八年金融海嘯期間，當間間金融機構都苦於為資金籌謀時，渣打是當時一眾銀行股中，最先提出集資的一間，於○八年十一月以91股供30股每股供45.11元，當時供股價折讓高達五成（今次三成二），嚇親唔少捧場客，但今日睇番，如果選擇共渡難關的，新舊股合計，今日累積接近200%利潤。

筆者認為集資來得意外，係因為渣打本身核心一級資本比率有9%，總第一級資本更為11.2%，已經好過唔少國際級銀行，況且，近期巴塞爾資本協定Ⅲ，已經變咗隻紙老虎，資本要求降低之外，實施寬限期同樣愈拖愈長，渣打此時發難，未知是否管理層對環球金融業前景唔多樂觀，實行攞咗至算？

集資搶攻新興市場

不過睇番供股通告，行政總裁Peter Sands就表示，隨着全球經濟實力重心由西向東轉移，亞洲、非洲及中東有無數的增長機會，而進行供股是為了把握機會，好能確保保持集團一貫的驕人業績，並同時為巴塞爾資本協定Ⅲ的落實而帶來的新資本要求作準備。

由此看來，與其說是因為巴塞爾Ⅲ要錢，倒不如話渣打看好海嘯後，亞、非及中東地區經濟，因此想在歐美銀行元氣未復之際，搶灘擴大新興市場基礎。有揸渣打的股東，似乎無不參與供股的理由，再睇，現價較歷史估值折讓近一成五，未有貨的，現在也是理想的入市時機。\\