股海實戰：中國財險 身價水漲船高

施政報告出爐，市場目光盡在住屋政策，結果一如預期未有復建居屋，取而代之係「先租後買」計劃，而投資移民則暫時剔除房地產作為投資資產類別，相信諸如此類嘅措施，可紓緩樓價上升壓力，但阿莊相信，政策大前提係以穩定樓市為主，但喺低息及美元弱勢下，樓價仍將維持喺高位運行。

昨日港股開市初段正正常常，誰知施政報告講住屋政策，地產股急跌，新地（00016）由高位138.8元急回至129.3元、長實（00001）亦由121.9元回落至113.5元，拖累恒指見全日低位23,035點。不過，午後A股市場走強，加上大行紛紛表示新措施對樓市影響有限，地產股跌幅收窄，恒指呈「V」形反彈，全日高位23,471點，收報23,457點，升335點，成交達到1,092億元。

阿莊相信，當昨日午後恒指掉頭抽穿23,300點，唔少淡友都經已捱唔住，大市尾段升勢頗急，相信正係由平倉盤帶動。睇怕十月好友點都要將恒指踢上24,000點，盡殺淡友先至肯罷休。

昨日刺激大市走高嘅另一個說法，乃投資移民暫不可投資房地產資產，估計這些資金會轉投股票市場，一些較為內地投資移民熟悉嘅中資股，如中國人壽（02628）、平保（02318）、及內銀股等便成吸納對象。阿莊就湊吓熱鬧，睇睇隻中國財險（02328）。

財險今年上半年錄得佳績，純利達到26.45億元人民幣，同比增長達三十二倍，每股盈利0.237元人民幣。展望下半年，受惠經濟持續復甦，料旗下企業財產險及貨運險表現可持續改善，而受惠汽車銷情火爆，機動車輛險業務規模仍佔總承保費較大比重，隨着公司加強分類管理，促進優化業務結構，相信機動車輛險的承保業績可取得明顯改善。

受惠A股市場回升

今年上半年，內地資本市場低迷，故見財險中期已實現及未實現嘅投資淨收益僅為2,800萬元人民幣，同比下降93%。不過，隨着下半年A股市場止跌回升，相信這方面嘅表現亦會有所改善，而中期業績公布後，其股價反覆走高，亦足以反映投行對其前景看法變得樂觀。

財險昨日收市報10.98元，升0.73%。基本上，現價已一定程度反映中期業績觸發嘅重估效應，至於近期A股氣氛大好，則成為新利好因素。若然年底前滬綜指果真反覆向3,000點大關進發，保險股身價亦可水漲船高。

此外，有消息指財險母公司人保集團計劃年底前引入戰略合作夥伴，籌備上市。財險既為人保嘅主要收益來源，相信可以交盤靚數配合母公司引資上市計劃，短期可留意喺9.5至10元邊分注上車，目標上移至12至13元，穿8.5元止蝕。

戰報

中材股份（01893）

冼金基本月六日推介中材股份，指其股價便宜，可趁低吸納，昨日見高位7.4元，較推介日低位6.49元，升14%。

田生集團（08136）

錢進上周五預期田生集團股價於突破後再展升浪，昨日創上市高位1.01元，較周五低位0.89元，累升13.4%。