太子手記：李家傑替恆地勁賺16億
恒地（00012）啱啱宣布用北京商場項目，換咗銀泰百貨（01833）7.74%股權，恒地太子Peter李家傑仲會入埋銀泰做非執董，睇到雙方嘅夥伴關係，太子尋日終於搵到身在內地嘅Peter，心情靚極嘅Peter講咗呢單刁嘅古仔，證明Peter嘅眼光，為恒地全數進帳16億元。四叔李兆基肯定以呢個仔為榮。
Peter話，燕莎友誼商場其實早喺九三年興建，當時係北京市政府同新加坡公司搞嘅中外合資公司，但當時內地根本唔興百貨店，所以經營狀況麻麻，但Peter就睇好中國零售業前景，用好平價錢買咗三分之二股權，兩年後再買埋餘下三分之一，合共只係用咗二億幾銀。
睇好銀泰百貨店策略
Peter笑住仲話，經營咗咁多年，嗰二億幾其實經已收回成本，依家全中國零售業一片火紅，就可用16億幾作價賣畀銀泰，仲係淨賺，將會喺恒地本年度帳目入帳，證明咗Peter嘅投資眼光夠準、夠長遠。
Peter唔要錢，要銀泰股權，亦係長遠睇好銀泰未來全國百貨店策略，如果有好項目，相信恒地會考慮合作，有錢齊齊搵。
李家傑幫恒地做成單大刁，可見佢眼光獨到。資料圖片