金牌AE：合生創展突破下降軌

近期落後大市嘅內房股，尋日逆市受追捧，上周二曾作推介嘅恒大地產（03333），當時股價2.75元，尋日最高見3.28元，收3.23元，大升13.3%，目標價3.25元已達標，不過基金買盤強勁，料整固後仍可向更高水平推進。

今日再推介一隻落後兼大超值嘅內房股合生創展（00754），股價由去年十月底嘅16元反覆跌至日前嘅8.35元，跌幅近50%，但過去一年內地樓價則升咗唔少（否則政府毋須打壓），相對合生股價跌得過殘，值得吸納，上番跌幅嘅一半，股價已可見12.2元。

走勢上亦好對辦，股價由年多來嘅低位回升，尋日已突破下降軌，MACD現買入訊號，加上有大成交配合，可確認中期整固完成，新升浪展開。

合生係內地大型地產發展商之一，截至今年六月底擁有土地儲備達2,976萬平方米，分布於各大城市，上半年盈利增67.4%至15.2億元，下半年盈利若同上半年睇齊，全年盈利30.4億元，每股獲利1.73元，預期市盈率5.2倍，同期每股資產淨值19.9元，市帳率0.45倍，以目標價12.2元計，亦分別只有七倍同0.61倍，仲係大偏低，中期就算股價上番20元，都好合理。

合生創展（00754）　目標價：12.2元　止蝕價：8.35元