信銀搞茶會學投資
本港投資者近年積極發掘具升值潛質嘅另類投資，信銀國際最近搞咗兩場「品茗怡情」賞茶會，喺中華廚藝學院招待咗接近240位CITICfirst財富管理服務嘅客戶，等啲客喺歎茶嘅同時認識茶葉嘅珍藏價值同投資秘訣。
即場示範整果凍
信銀國際仲邀請咗中國國際茶藝會會長廖子芳同埋囍宴老闆余健志（Jacky）擔任嘉賓。廖子芳同太子講，茶葉嘅年份、產區、製茶廠以至包裝等，都會影響茶葉嘅投資價值。
Jacky除咗有份幫活動設計部分菜式以茶入饌外，仲即場示範整菊花茶果凍。
信銀國際執行副總裁兼財富管理及零售信貸部主管劉月屏（Zoe）全程聚精會神咁在旁學師，細問之下，先知道原來事業型嘅Zoe十分熱愛下廚，但因為工作繁忙，甚少機會可以享受入廚樂。
劉月屏話佢哋嘅客戶對投資茶葉有濃厚興趣，所以特登舉辦呢次活動。