今次全球央行大合奏，繼歐洲央行持續買入國債，美國聯儲局再次表態會實施量化寬鬆措施，連日本央行亦宣布回歸零息政策，並成立5萬億日圓基金買入債券，如此重藥，股市焉能不升？
還記得○八年十一月，中國宣布喺兩年內擲4萬億元人民幣刺激經濟，滬綜指喺其後九個月足足翻了一番。不過，今次唔同嘅係，想落重藥嘅係經濟積弱已久嘅歐、美和日本，與中國比較，成效肯定要打個折扣，結果如何？還要放長雙眼等着瞧，但面對熱錢不斷湧入，新興市場如何駕馭市場風險，倒引發另一問題。投資者炒還炒，風險意識亦宜相應提高。
新股表現個別發展，九月廿四日掛牌嘅半新股暢豐車橋（01039），收夠貨開車，昨日創上市以來新高5.22元，收報5.19元，升13.07%。不過，昨日才掛牌嘅海豐國際（01308）就唔多靚仔，招股價4.78元，全日潛水，高位4.75元，低位曾見4.29元，收報4.53元，較招股價低5.2%，認購者持貨首日帳面要損手。
講開新股，友邦保險即將展開招股活動，聽聞已引入六名基礎股東。阿莊認為，陸續有公司搶喺年底前上市，但新股經已炒咗一排，嚟緊質素可能較參差，未必再係隻隻都可以為股民賺錢，漁翁撒網式認購風險高！
港交所逼近阻力位
不過，新股排隊上市，質素不論優劣，港交所（00388）坐收上市費，袋袋平安，肯定係得益者，再加上近日大市成交不斷增加，昨日其股價曾高見163.5元，收報160元，升0.1%，成交16.7億元。阿莊估計，隻股呢轉升到165至167元水平，將會遇上較大沽壓，呢啲水平先至追入相關購輪或牛證未必划算。
市場憧憬歐、美各國展開新一輪量化寬鬆政策，刺激經濟，加上適逢挨近年尾，又係貨運業嘅旺季，反映乾散貨運價嘅波羅的海指數連日上升，帶動航運股做好，中海發展（01138）升2.8%、中外運（00598）升3.2%、中遠太平洋（01199）升2.69%，但論升幅，要數中國遠洋（01919）表現最佳，收報9.58元，升5.9%。
從走勢上看，中國遠洋股價自七月低位反覆回揚，已明顯見到上升通道，若是浪能回補五月初的裂口頂部9.7元，走勢可呈突破，並反覆向主要阻力位11元水平推進，跌穿8.75元止蝕。
戰報
招金礦業（01818）
錢進九月二十七日推介招金礦業，其股價昨日創五十二周高位26元，較推介當日低位23.1元，累升12.55%。
中電新能源（00735）
冼金基上周三推介中電新能源，指其股價有望突破下降軌，昨日高見0.83元，較推介日低位0.75元，升10.66%。