早前市場傳來唔少上市公司配股集資消息，執筆時便聽到光控（00165）擬配股集資逾24億元。為何大量伸手活動出現，但個市仲未散？阿莊翻查資料，近日恒指認沽輪街貨明顯增加，約為恒指認購證街貨量嘅三倍。原來咁多人做淡友，大市不跌之謎可解！睇圖表走勢，若然外圍市況配合，恒指可能仲要一試去年十一月十八日高位23,099點，先至會有較大幅度嘅回吐。
消費股暫未宜高追
睇番個股表現，體育用品股匹克（01968）獲高盛給予買入評級，股價曾飆升10%，收報6.22元，升9.3%。阿莊早已講過呢位「高」人指引唔可以忽視，前日便提及高盛將滙控納入「確信買入」名單，昨見滙控最高抽上81.05元，且看今次能否喺「高」人發力下突破82元大關。
內地傳媒報道，十月一至四日，深圳各口岸出入境旅客超過230萬人次，同比增長近兩成。如今內地遊客消費力高，故見香港名店銷售員一聽見操「煲冬瓜」客就四萬咁嘅口上前招呼。更值得一提的是，如今內地遊客唔貴唔買，有品牌嘅幾貴都肯買。廣為內地客熟悉嘅消費品牌，如六福（00590）、周生生（00116），以及卓悅（00653），生意認真唔憂做，只係第三季股價升得實在太厲害，現水平暫不建議高追。
內房股可逢低收集
再睇內地A股，阿莊相信今年係見底年，踏入「十二．五規劃」，將可迎來一個長期大升浪，抄底機會難逢。雖然長假前中央先下手為強，推出新一輪樓市調控措施，致使今個「十．一」期間，北京、上海等主要城市樓市成交急降，但阿莊相信類似政策無損內房長遠健康發展，有銀人士大可逢低收集三隻實力內房股——中國海外（00688）、華潤置地（01109）及上海實業（00363）。
此外，針對中西部發展，重慶機電（02722）亦值得關注。昨日該股創五十二周高位2.66元，收報2.56元，跌0.3%，成交1.05億元。
受惠基建需求大幅增加，重機旗下商用車輛零部件、電力設備、通用機械和數控機床業務銷情理想，上半年營業額按年增52%至42.63億元（人民幣．下同），純利增60%至3.45億元。由於展望下半年原材料價格穩定，相信全年佳績可期。保守假設下半年度盈利表現與上半年相若，現價預測市盈率約十二倍，重估潛力未完全發揮，可睇位趕搭順風車。
戰報
中信資源（01205）
志強九月二十四日推介中信資源，指其分拆錳業將利好股價，昨日高見2.19元，較推介當日升16.5%。
特步國際（01368）
錢進九月二十四日指特步國際定單數量穩定增長，股價昨日裂口高開6.94元，較推介日累積升10.2%。