本文重點
華資大孖沙睇風水,大家見得多,原來「老外」都有呢個喜好!話說即將喺本月尾登場嘅友邦保險(AIA),公司班高層早前就搵風水師,以決定上市編號。
坊間傳聞話AIA班上市軍師,早喺個幾月前,已為AIA安排好上市編號「3338」,諗住「生生生發」,咁好意頭,AIA實非常滿意。
事實上,過去好似港交所(00388)等上市編號有「生」有「發」嘅股票,股價表現都不錯呢!
殊不知,AIA班高層搵咗風水師睇風水,建議上市編號「1299」會比較旺AIA,於是乎AIA最終敲定「1299」為上市編號。至於點解「1299」較旺AIA,真係要問吓高人指點了!
謝仕榮坐鎮非執董
AIA上市已經埋牙,尋日仲宣布正式成立由八名成員組成嘅新董事會。太子一睇佢哋嘅董事名單,唔單只粒粒都係巨星級數,仲包括AIA傳奇人物謝仕榮。謝仕榮一手將AIA搞到有聲有色,佢喺呢個集團絕對係有功又有勞嘅老臣子,喺○九年三月退休轉任AIA嘅榮譽主席,依家由佢擔任非執董亦實至名歸,相信可帶嚟寶貴意見。
董事會入面唔少都係大家熟識嘅名字,獨立非執董有港鐵(00066)首席執行官周松崗、出名多計嘅前政務司司長許仕仁及招商銀行(03968)前董事長秦曉,而蘇澤光同謝仕榮就做非執董。