潮流服裝係筆者至愛之一，睇我近期戴嘅G-Shock白色潮錶已經可知一二，見到朋友係唔係都用身上潮流產品做指標，咁就肯定零售業務又慢慢從谷底回升，其中嘅佼佼者梗係I.T（00999）啦！
一般服裝企業要快速「做起」，都係以分銷管道起家，然後打造本身嘅品牌，再由一個品牌衍生出一系列品牌，透過品牌槓桿（Brand Leverage）打造潮流品牌陣營。I.T嘅自家品牌多不勝數，有「5cm」、「︰CHOCOOLATE」等等。未成熟嘅繼續留喺阿媽度慢慢栽種，成熟嘅就獨自闖天下。
I.T股價依家已經破晒頂，個個都話超買，但如果經濟走入新周期，咁即係另一個經濟循環嘅開始，喺呢個大前提下，內需零售實冇衰，配合「中國藍圖」嘅不敗元素，如果「高位回，成交低」，可以搵機會走多幾轉。追蹤住啦！