不過，今年十月第一個交易日，相信唔少股民都興奮非常，皆因甫踏入第四季首個交易日，恒指已升260點，收報22,618點，中段的高位22,734點，甚至改寫了年初造出的22,671點全年高位，大市成交達960億元，屬今年第四高紀錄，而對上三個高成交紀錄，其中有兩日是多得平保（02318）及中移（00941）配股，故昨日港股實質交易的熾熱程度，絕對配得上升勢。
銀紙貶值惹炒風
近期同幾位私募基金揸Fit人閒談，從他們的言談中，得知今時今日要搵理想回報投資，難度之大是超乎想像。當今歐、美、日央行齊齊透過增加貨幣供應以刺激經濟，全球流動性增加，鈔票貶值自然在所難免，亦導致各類型投資項目，回報愈搶愈低。
試問當下買美債借錢畀美國政府，回報得2.5厘，嫌少？買層新樓搵租客，未計各類使費，租金回報可以唔夠2厘，但一樣大把人咁做，點解？
一來同銀行借錢，息率可以低於1厘，仲有微薄利潤，更重要係，今日揸住鈔票，尤其是同美元掛鈎的港幣，扣減通脹因素，放入銀行每年購買力可以唔見3至4%，愈擺愈縮水，試問點會唔亂炒一通？磚頭又好，石油、黃金、白銀都好，總之要揸實物唔要銀紙。
油價升勢難逆轉
講番港股，每季之初，唔少基金經理都會重新整理一下投資組合，所以尋日的高成交額，並唔令人意外，反而內銀、內房、內需股高開低收，有上升乏力、趁高獲利的迹象，卻是令人始料不及。
尋日指數成分股中最標青的，竟然是中海油（00883）及中石油（00857）這兩隻內地石油巨無霸，昨日分別貢獻恒指51點及41點，計埋煤炭股龍頭神華（01088），三隻股票佔尋日大市260點升幅的四成二。
大孖沙賭資源股上升，查實係合情合理，在過去五個星期，美元累積跌6%，金價升6.1%，去到每安士1,320美元水平，油價更升12%之多。押注石油股，當然係賭「黑色黃金」的升勢可以持續，假如第四季中美經濟數據麻麻，市場自自然會估美國聯儲局要推出二輪刺激經濟方案，商品價格就無理由唔升。
掉番轉頭諗，即使數據理想，例如中美PMI都繼續高企，反映經濟擴張，賭徒們亦會以經濟好需求回升為理由，繼續炒上去，結果無論開大開小，商品價格或者商品股，都會成為受惠者。
兩隻石油股中，證券行預測中石油一一年可賺1,445.4億元（人民幣．下同），每股盈利80.7分，市盈率10.2倍，較○六年暴利稅開徵後，平均估值10.7倍仲有大約4.7%折讓；至於中海油，就預測其一一年利潤可達472.3億元或者每股1.064元，市盈率11.4倍，稍高於同期平均估值11.3倍，預測股息回報，兩股分別為4.3厘及3.2厘。
其實押注資源股，兩隻都係穩陣之選，但筆者個人觀感，在低息期可能比預期長下，高息的中石油會是較佳的選擇。