本文重點
近年企業管治係好重要嘅課題，特別係上市公司，合和實業（00054）就係其中一個例子，唔知同佢地嘅董事總經理胡文新，做咗香港上市公司商會副主席有冇關係，因為呢個商會嘅宗旨之一，就係要搞好上市公司嘅企業管治。
合和最近有一個舉措，相信係同企業管治有關。事緣佢地嘅年報，一直有描述一家叫合信保險及再保險顧問公司（HCNH），但至今年最新年報就唔見咗呢家公司嘅蹤影，老友話合和已經賣咗呢家聯營公司。
賣聯營公司避嫌
查實合和只係揸住HCNH嘅25%股權，最大嗰份係屬於何炳章，佢透過公司持有HCNH嘅50%權益，何炳章係合和老臣子，家陣依然係合和副主席。HCNH過往有為合和，同埋合和嘅附屬公司提供保險服務。
據老友話，合和早前已經賣咗HCNH，大家已經冇股權關係，HCNH以前嘅office都喺合和中心，依家仲搬走埋添，果然係完全分手。其實都好嘅，如果真係要搞好公司管治，細微嘅小節都要好小心，以免瓜田李下，惹人懷疑有利益衝突就唔抵啦。