有股友問阿莊，香港打工仔人工冇得加，但交通、食品、住屋價格就樣樣都升，港股有咩條件升？阿莊就回應，若然你用咁嘅標準去衡量股市升跌，注定跟升市無緣，皆因依家香港股市已經唔再係百分百由本地經濟帶動，中國經濟因素、美元及人民幣匯率因素，影響更甚。依家港元跟美元掛鈎，美元再展新一輪貶值潮，港股升勢只不過係反映美元貶值因素。總而言之，阿莊奉勸各位，有錢最好係揸實物，股票首選，樓就次選，揸現金唔保值兼且會貶值！
地產股續成火車頭
展望本周股市，內地休市可以睇少瓣，只要外圍市況生生性性，港股十月高位好大機會喺上旬出現，而本港地產股將繼續成為升市領頭羊。
講開地產股，長假前又有市區靚地被勾出，九龍塘延文禮士道住宅地皮以17.16億元被勾出，睇怕又係起好賣萬萬聲1呎嘅豪宅。咁啱同樣位處九龍塘的義德道3號及5號地皮，就會喺下周二拍賣。政府口口聲聲話要增加市場供應，但偏偏推出嘅地皮大部分都係唔貴唔賣嘅豪宅地，無殼蝸牛真係要自求多福！
個股方面，上周四阿莊建議可留意追落後機會嘅東航（00670）一度升上4.83元，收報4.74元；而上周三買入嘅銘源醫療（00233）則以全日高位1.05元收市，升幅7%，表現未有令人失望。
H股上市計劃捲土重來嘅金風科技（02208），聽聞以上限價17.98元定價，相等於今年預測市盈率16.9倍，而目前中傳動（00658）嘅預測市盈率則為十三至十四倍左右，若要跟金風睇齊，至少都值18.5元，上周四該股收報16.84元。
土儲豐厚撐起股價
中新地產（00563）自上實（00363）入主後，已脫胎換骨，公司將改名為「上海實業城市開發集團」，以正其名。公司上周披露，聯同上實等公司以24.29億元人民幣成功投得上海一土地之使用權。阿莊相信，類似嘅聯合行動尚會陸續有來，以顯示上實作為市政府窗口公司下，發展上海房地產業務嘅優勢。
除收購消息外，未來上實如何着手整理上實發展A股以及中新地產嘅資產，以更有效發揮其融資功能，正係市場關注嘅焦點。
憑着中新本身坐擁2,000萬平方米土地儲備，加上其潛在併購活動，將支持股價進入長期上升軌道，短期調控並未動搖公司長遠發展方向，近期內房股波動，正好提供上車機會！
戰報
廣汽集團（02238）
錢進九月十四日指廣汽（02238）可進一步做好，股價上周四創上市新高13.66元，較推介當日低位勁升26.2%。
中國食品（00506）
姚午齊上周二推介中國食品（00506），股價上周四高見6.88元，較推介當日低位6.1元，升幅達12.7%。