講番今個月，除咗賣地、新盤出籠之外，另一個市場最關心嘅，就係施政報告裏面，究竟會有乜嘢涉及樓市嘅政策推出嚟。當然，最講得興起嘅，自然就係會唔會復建居屋喇。

其實，復建居屋呢樣嘢，喺社會已經討論多時，政府亦都話收到好多人支持復建居屋，但係轉頭就即刻放風，為復建居屋閂定後門。

復建推售需要四年

的確，復建居屋係存在時滯嘅風險，即係當一旦拍板起居屋，由撥款、批地、招標、興建，到推出市場，閒閒地都要三至四年，到時樓市會係乜嘢光景，大家都唔知。尤其係經過「八萬五」一役，政府更加係驚弓之鳥，好驚又再會搞個「大頭佛」出嚟。

其實，Paul少覺得，最重要嘅問題就係政府好似唔係咁搞得清楚自己嘅角色。首先，政府興建居屋，由頭到尾都係要幫一啲小市民安居樂業，同時又可以減少一啲有能力置業嘅人，繼續「霸」住個公屋單位。不過，政府喺心態上，唔應該係發展商，亦都唔應該係投資者，所以根本唔係要考慮萬一樓市出現大逆轉時，可唔可以「全身而退」。

就算touch wood講句，政府真係要「坐貨」，政府自問亦都「坐得起」。好似過去幾年咁，政府將嗰批八萬五政策遺留落嚟嘅「蘇州屎」都清理得七七八八，有啲轉做居屋，有啲又轉做公務員宿舍，然後再有啲趁市好先至賣番出去。結果，喺過去呢幾年，啲重售嘅剩餘居屋，對樓市一直都冇乜負面影響，反而幫到好多公屋戶去置業。

資助置貸不應考慮

另外，政府更加唔係負責喺市場上製造需求，去滿足地產商嘅利潤，所以一啲好似置業貸款之類嘅現金資助，根本唔應該再考慮，因為咁樣做，只不過係用人為方式，為市場製造大量新增嘅需求，當需求進一步增加，試問樓價又點會唔愈嚟愈瘋狂呢？

要求政府復建居屋，Paul少覺得班高官，應該順應民意照做，就算他日樓市逆轉，為政府帶嚟財政壓力，大家都好體諒，但係如果政府成日為咗唔想「孭上身」，就寧願合埋眼唔肯承擔責任，咁就算出幾多遏抑樓市嘅招數都係多餘嘅。