本文重點
全世界嘅證券交易所都要諗計加強競爭力，延長交易時段係其中一個方法。好似香港咁，依家仲諮詢緊，不過一定延硬，只要中午夠時間食個晏，整體嚟講，經紀都冇乜反對。喺日本就唔同講法，可能因為改革得太進取，據聞反對聲音好大。
日本嘅東京證券交易所喺七月時，話建議完全取消食晏時間，令到佢哋嘅交易時間可以同其他亞洲證券交易所完全銜接，兼且可以增強競爭力。以前佢哋嘅食飯時間都唔係好長，只不過係九十分鐘，仲短過香港。
75%人反對縮午休
為咗呢個改革，東京證券交易所訪問咗一批散戶，又向機構投資者進行意見調查，得出嘅結果係反對聲音好大，七成半嘅人反對。
日本喺好多年前都提出過延長交易時間，最終冇下文，皆因業界憂慮要請多啲職員，令成本上漲。
如果呢個意見調查真係有代表性，日本嘅交易時間，睇怕要原地踏步。香港會唔會有更大商機？