執筆時，傳來高盛擬沽售工行（01398）股份嘅消息，批盪活動陸續有來，加上內地官方傳媒報道，相關部委將於近日出台措施鞏固樓市調控成果，包括各商業銀行暫停發放居民家庭購買第三套及以上住房貸款，睇嚟市況承接力將受到考驗。咁啱聽日就係「十．一」黃金周開始，查實喺炒家眼中，內地休市成個禮拜，反而可睇少一瓣。長假前傳來內地推出調控樓市新措施，相信係當局有心讓市場有足夠時間消化，免得黃金周售樓數字太過瘋狂，搞亂個場！
樓價缺乏下調空間
回說昨日賣地，就連拍賣官都話，對於「流拍」一事感到驚訝，直到有發展商主動出嚟解畫，指柴灣地皮冇景兼有斜坡，唔舉手同對後市睇法無關，大家才知咩事，睇嚟問題源頭係政府太過匆忙推出地皮拍賣，未有做好事前調研工夫所致，可見對於增加市場土地供應，政府根本未有認真籌劃。
本來預計十月份施政報告會針對樓市炒風推出新猷，但近日市場消息指，政府不傾向復建居屋，而係考慮向夾心階層提供「先租後買」嘅資助置業計劃，睇嚟市場供應唔會有咩大改變，喺低息環境持續下，樓價下跌空間唔大。
個股方面，昨日提及嘅銘源醫療（00233）現回吐，收市報0.98元，阿莊以平均價0.97元買入50萬股等運到。
另一隻阿莊正高度關注嘅股份乃晨鳴（01812）。今年三、四月，阿莊亦曾短炒晨鳴一轉，獲利10萬元，如今想翻兜，主要係有見近年公司積極構建嘅林紙一體化產業鏈將逐步發揮效益，加上行業景氣向好，現價估值吸引，正考慮喺7元邊再上車。
國航升穿10元大關
人民幣升值概念熱炒之下，主要以美元為負債嘅航空股，頓成受益股類。阿莊喺九月六日推介嘅國航（00753），已順利升穿10元大關，昨日收報10.44元，升2.9%。再睇兩隻負債較高嘅航空股，本月以來，南航（01055）高位較上月高位高出17%，反觀東航（00670）僅大致持平，具追落後概念。
再睇番近半年東航嘅股價走勢，今年四月及八月升勢均受制於4.5元水平，但過去六個交易日，東航收市價一直企穩喺4.5元樓上，可以講中期走勢已呈突破，而睇近幾日股價雖然處於高位，但成交未有大增，反映獲利沽壓亦不大。若然閣下深信，年底前人民幣點都要升值一次，照計東航仍追得過！
戰報
中國重汽（03808）
阿莊本月十六日推介中國重汽，指其積極開拓國際市場，股價昨日高見8.09元，較推介當日低位升11.1%。
I.T（00999）
錢進十七日指I.T整固完成，可發動新一輪升浪，股價昨日最高見4.85元，較推介當日勁升16.8%。