本文重點
港交所（00388）主席夏佳理下個月十至十二號，會去法國出席國際交易所聯會（WFE） 年會會議，今次年會意義重大，除咗係WFE五十周年外，仲會選出WFE新主席，香港代表嘅夏佳理係今次主席大熱人選。夏佳理仲計劃今次順道去意大利推介香港，見吓當地企業，斷估佢都會趁機游說女士鍾情嘅Prada來港上市！
游說企業港掛牌
港交所近年積極開拓海外公司來港上市，夏佳理趁住今次法國之行，正計劃緊行程，順道去埋意大利會見當地企業，推介佢哋嚟香港上市。早前已盛傳Prada有意來港上市，如果今次夏佳理去意大利，估計佢定會游說Prada嚟香港上市啦！
之不過，意大利出名嘅又點止Prada，男士們就話法拉利都係意大利出品呢！唔知法拉利有冇興趣加入港股呢個大家庭呢？
講番WFE，夏佳理依家係副主席，按傳統慣例，由副主席升任主席嘅機會好大。若夏佳理當選WFE新主席，肯定為港爭光。