今日政府賣地，但由於地皮晒士唔係好大，且非黃金地段，相信成交價對後市參考性一般。反而更重要嘅係，呢期發展商在力谷新盤，相信幾隻龍頭地產股股價點都要再撐一會﹗
原材料製造板塊起動，中國鋁業（02600）、中信資源（01205）及中國稀土（00769）升幅介乎4至9%。阿莊見隻信義玻璃（00868）調整兩日，低位具承接，遂於昨日按平均價每股4.78元買入15萬股，該股收市報4.81元，跌2.04%。
車股提防粉飾窗櫥
此外，呢期汽車股真係升到你唔信，隻華晨汽車（01114）股價衝到上5元關仍然頭也不回，買盤積極，收報5.15元，升3.62%；廣汽集團（02238）昨創掛牌後即市新高12.5元，收報12.34元，升1.48%；長城汽車（02333）亦創五十二周新高，報19.02元，升2.59%。
阿莊認為，單論內地汽車業基本因素，其實最近唔見到有乜大變動，只不過，今年汽車股繼續獲國策護蔭，獲基金重倉持有。適逢時近季結，基金們樂於趁旺市炒一轉，以便交成績表。然則係咪應該入市追貨，各位好自為之。
新股博士蛙（01698）及碧生源（00926）將於今日掛牌，料又有一番炒作。講開碧生源，同樣從事保健產品嘅瑞年（02010）又有股東配售舊股，股價即插逾8%。事實上，瑞年喺今年二月以每股3元招股上市，依家策略股東已穩袋一倍利潤，沽貨套現亦唔出奇。
醫藥概念長炒長有
提到保健產品，內地正積極推動醫療改革，包括保健、生物醫藥、醫療器材等醫藥概念股，可視為股海「長青」炒作概念。講到呢類股份，昨日阿莊留意到，銘源醫療（00233）股價終呈突破，一口氣升穿1元關，收報1.01元，升13%，成交達到1.86億元。
銘源去年度業績因行政費用增加以致純利倒退，但見其上月底宣布今年上半年度業績，中期純利9,389萬元，同比增長3%，顯見盈利能力已復常。
其實，銘源係內地早期測試及疾病檢測領域嘅生物醫療公司領軍者，如今已有多項產品發展進入成熟期。踏入「十二．五規劃」，國策將積極扶持七大新興產業，生物科技就係其中一類。
公司嘅定位清晰，有業務基礎、有市場，亦係產業政策受益者，偏偏過去大半年股價一直喺低位徘徊，直至昨日終告突破橫行區頂部，強勢可追，下站目標睇1.3元，跌穿0.88元止蝕。
戰報
神威藥業（02877）
阿MAY本月十四日指神威藥業下半年業務增長勢頭持續，股價昨日高見27.2元，較推介當日低位22.6元，升20.3%。
+20.3%
中國旺旺（00151）
史提芬上周五推介中國旺旺，指其經營效率理想，股價昨日創7.38元上市新高，較推介當日累計升幅12.3%。
+12.3%