本文重點
太子發覺銀行界呢排唔興玩跨行音樂椅，而轉咗場喺自己間行玩，繼滙控人事大變之後，花旗香港尋日同太子講，一口氣委任咗三個總監，都係自己人，仲要三個高層都係女士添，真係唔講得笑。
蔡麗鳳過檔廣發行
太子打聽到事緣係花旗香港前環球個人銀行服務銷售及分銷業務總監蔡麗鳳（Amy）過檔廣東發展銀行，於是就由之前做財富管理業務總監嘅林素芬（Fanny）接手，個職位仲轉埋做環球個人銀行服務分行網絡業務總監，之但係Fanny個位，就由前財富管理業務部投資產品及銷售部主管李貴莊（Josephine）升任。
除咗兩位女士之外，花旗香港仲委任咗梁靜宜（Maria）做環球個人銀行服務花旗私人客戶業務總監，雖然佢唔係內部調任，但其實以前都係花旗香港嘅人，今次可謂返屋企。
香港呢邊高層大執位之餘，花旗同渣打一樣睇好非洲同中國，仲開咗隊中國專隊，負責服務南非嘅中資客，一網打盡兩大新興市場，真係高瞻遠矚。