近日滙控（00005）表現較落後，主要受累於高層人士變動消息困擾，惟如今事件終於獲解決，集團主席一職由財務總監范智廉出任，且看本周股價能否撥開雲霧，一舉衝穿250日線82.35元。
新股熱愈燒愈旺
股海係社會縮影嘅一部分，勝者永遠係講實力，股票如是，投資者也如是。國際形勢也一樣，今時唔同往日，依家中國經濟如日方中，日本國運卻衰足十年都仲未衰完，日本政府想藉打民族主義牌以轉移國民對政府施政嘅不滿，結果搞到要自摑收場，仲損害與中國嘅關係，不自量力換來「雙失」結果。上周中秋假前後，淡友亦曾意圖用中、日關係惡化為由喺股市吹淡風，但唔成氣候，事關市底強，邪不能勝正！
上周五多隻新股登場，其中微創醫療（00853）收市價較招股價升近36%，認購每手帳面利潤逾2,000銀，真係幾唔錯。由於新股勢頭強勁，相信本周掛牌嘅新股都有唔錯表現，邊隻先至係今年嘅「新股賺錢王」，唔好咁快下定論！
展望本周，股市另一焦點，乃周二國美電器（00493）召開股東特別大會，兩派之爭究竟誰勝誰負，國美前景又何去何從，阿莊無本事做「漁人」，翹埋雙手等睇戲。此外，本周三政府將拍賣柴灣及粉嶺官地，市場預計可為庫房帶來合共約9.5億至11.5億元進帳，近期地產股強勢，相信與憧憬賣地成績，以及近期地產商力谷新盤趕年尾交數有關。
黃金周銷情看俏
上周五，美國國會眾議院籌款委員會投票通過對所謂低估本幣匯率嘅國家徵收特別關稅嘅法案，旨在對中國匯改施加壓力，且看A股復市後如何反應。
講到今個黃金周，聽聞話內地香港遊報團人數減少。對於呢個現象，阿莊唔感到奇怪，事關唔少同胞都唔係第一次嚟香港，可自行遊港，報團人數減少不代表訪港人數會減少，阿莊反而對於今個黃金周嘅消費市道表現感到樂觀。見上周零售股繼續輪流炒。
零售股中，論落後非香港資源（02882）莫屬，上周五終於不甘寂寞，曾抽高至1.41元，收報1.39元，升7.75%，成交5,164萬元。公司位於深圳嘅金至尊珠寶中國營運總部已正式開幕，管理層指今年上半年及上周中秋嘅銷售額都有理想增幅，期望今個黃金周銷售亦會有好表現。股價既靜極思動，可以湊熱鬧跟炒一轉，上望1.6至1.7元，穿1.3元止蝕。
戰報
瑞年國際（02010）
史提芬本月十七日指瑞年估值具上調空間，當日低位5.93元，上周五股價創6.87元上市新高，升幅15.8%。
中國自動化（00569）
姚午齊本月十六日推介中自化，指其走勢向好，上周五其股價高見6.25元，較推介當日低位5.36元升16.6%。