上次講完《孫子兵法》得到讀者電郵回應，所以今次講吓另一本中國嘅奇書《道德經》。春秋時代，老子嘅《道德經》散發中國人應有嘅智慧。《道德經》因為對事物有高度包含性，所以係屬於哲學範疇嘅書籍，雖然依家進入高科技嘅金融投資時代，《道德經》亦成為教人投資心態上嘅一本經典，每個投資者如果能慢慢掌握，必定拍案叫好。都係講唔晒，得閒自己再搵書睇，以下係一個道德經喺投資策略上嘅應用。
「道可道，非常道；名可名，非常名。」投資可以好清楚咁講明，就唔係永恒不變嘅道理，因為呢啲道理高深莫測，好難用普通嘅文字同語言解釋，我哋成日希望對投資市場同埋投資嘅項目能夠整理出一個感應，畀事物嘅規律一個名，但係事物成日都變，同我哋腦海裏面形成嘅概念，同事物真象總係有一段距離。