中秋假前港股高位波動，恒指曾升抵22,229點，收報22,047點，升45點，大市成交690億元。內地股市下周一才復市，相信呢段時間可排除政策消息，炒港股暫時可以睇少一瓣。
值得一提，周三尾市地產股發力，新地（00016）升1.7%；長實（00001）續創新高，全日高見112.6元，收報111.5元，升2.1%；就連阿莊早幾日提過可以博炒落後嘅新世界發展（00017）及恒基地產（00012）都分別升1.5%及2.6%。阿莊自問仍未完全睇通十月市況，但無論如何，相信班大戶至少會撐埋個九月期指結算，先至有機會玩轉邊。
講開藍籌股，周三中銀香港（02388）走勢亦唔錯，曾高見23.7元，收報23.5元，升3.5%，創五十二周新高。中銀業務受益於人民幣加快國際化，估值可獲上調，唔憂炒作藉口，如今股價既已破頂，理論上可以跟勢追，下站睇25至26元，穿21.8元止蝕。
此外，阿莊話會睇位進場嘅和黃（00013），周三收報65.2元，跌0.6%。阿莊亦唔望佢會回得多，會先觀察10日線63元水平承接，再作部署。
大昌行（01828）自上月中旬公布中期業績後，股價反覆走高，走勢之強，實在令人咋舌，周三再創歷史新高8.79元，收報8.65元，單日升9.7%，成交2.65億元。事緣又多一家大行加入唱好行列，呢家就係渣打，指大昌行合理價值14元。惟阿莊反而覺得，該股現價估值經已唔算得上太吸引，若然冇貨底，實在唔建議喺呢啲水平沾手。
信義玻璃有力再上
要追基金愛股，阿莊喺上月十二日推介過嘅信義玻璃（00868），當時所定股價坐四望五嘅目標經已實現，走勢比想像中強，短線回吐守4.5元，有條件再繼續炒高。講開又講，呢期摩根大通眼光幾準，該行最近發表嘅報告就將信義目標價定喺6.8元，大家不妨作為參考。
早前提到金風科技（02208）上市計劃捲土重來，又令阿莊聯想起，中傳動（00658）可炒影子概念。該股本月上旬以先舊後新方式配股，每股作價17.38元，公司集資金額約22億元，另股東售舊股套現9.9億元。
配股後，中傳動股價一度受壓，曾經跌穿配股價，低見16.98元才回穩，周三回升至18.16元，收報17.66元，升1.49%，成交5.34億元，乃近次配股上板以來最大單日成交額。
聞到炒味，唔排除股價整裝待發，投機性跟進，目標上試20元關，跌穿16.5元止蝕。
戰報
中國利郎（01234）
史提芬於上周三推介利郎，其股價本周三創12元上市新高，較推介當日的低位10.52元累升14%。
堡獅龍（00592）
錢進周三推介的堡獅龍，在佳續帶動下，股價即日高位見0.92元，以低位0.81元計，單日升幅13.5%。