本文重點
尋日中秋佳節，好多人放工後都想急急腳返屋企過節，新地（00016）就好體恤員工，每年中秋佳節都專登畀員工早啲放工，返去同家人慶團圓，尋日佢哋就下午四點半放工。太子老友仲話，平日公司午餐包伙食只是五餸一湯嘅家常小菜，但每逢大時大節就會「加料」，有燒肉、雞及甜酸大蝦等，太子聽到都真係想食埋一份。
郭炳聯巡商場收風
講開新地，佢哋最新公布的業績認真「靚仔」，尤其租金收入升得最標青，老友話副主席郭炳聯喺租務方面真係畀咗好多心機，佢唔單止平日工作勤力，好多時星期日仲會微服出巡旗下嘅商場，除了觀察人流外，仲會入埋舖同啲商戶傾偈，睇吓有乜可以做得更好，收集得嚟嘅情報，就會同租務部啲同事反映。
佢仲話，老闆除了巡場外，就連新地商場嘅租務例會，郭炳聯都會親自落區去主持。新地於上海嘅兩大項目上海國金中心及上海環貿廣場更不在話下，郭炳聯都親自飛咗好多趟去睇。
此外，郭炳聯亦好重視九龍環球貿易廣場觀景台天際100呢個項目，雖然個觀景台今年第四季先招待公眾參觀，但下星期一就會舉行「頭炮」記者會介紹呢個觀景台嘅特色及負責接待員工嘅制服，郭炳聯仲會親自主持個記者會添。