一年容易又中秋，唔經唔覺又過咗接近三季，如今睇嚟世界經濟出現雙底衰退嘅可能性唔大。美國國家經濟研究局亦表示，美國衰退已於去年六月結束。經驗告訴阿莊，股市通常走喺經濟表現前六個月，近期美股強勢，係咪行先一步嘅表現，就要走着瞧﹗

放大圖片

放大圖片

港交所身價看漲

港交所（00388）行政總裁李小加係中國通，當年首批紅籌在港上市，投行中已無人不曉此君大名，亦正因為有呢個背景，其中國視野非前任行政總裁能及。近日李總發表上任後首篇大論，詳述開拓人民幣市場構想，具體係擬構建離岸「人民幣資金池」，多方面吸引內資來港。

阿莊覺得，其說法大前提係清楚香港嘅定位，着眼發揮自身市場嘅獨特優勢，而唔係只懂叫「國際金融中心」口號，執着於與上海爭一日之長短，咁先至係知己知彼嘅做法。

若然呢番鴻圖大計得以落實，港交所身價亦可水漲船高。

回說昨日市況，恒指高開見全日高位22,118點後轉反覆，收市險守22,000點，報22,002點，升25點，大市成交703億元，即月期指高水57點。

田生食胡獲厚利

阿莊前日話隻田生集團（08136）會睇位食胡，昨早遂以平均價每股0.95元沽出140萬股，套現約132萬元，獲利約44.3萬元。今年港股大部分時間行上落市，日日炒出炒入嘅策略賺唔到錢兼傷神，反而搵啱心水股坐貨先至賺到大錢，早前阿莊投資獲利嘅中芯（00981）（現有持貨乃以當時嘅利潤購入）如是，今次揸田生半年穩收五成回報，又係另一佳作。

異動股方面，從事製銷各類電動工具業務嘅創科（00669）股價做好，已成功突破上周初高位7.5元，收市報7.65元，升4.65%，成交7,099萬元。

去年創科業績理想，賺4.9億元，按年增幅1.8倍，而今年上半年中期純利已達到3.62億元，主要係近年積極實施嘅多元化發展策略收效，而歐洲嘅重組計劃亦替公司減少開支，相信全年佳績可期，估值仍具上調空間。

今年四月，創科股價曾抽高上9元，但次季出現歐洲債務危機，令股價再次下沉，三次成功考驗6元關下重拾升軌，只要歐、美經濟唔再大震盪，相信年底前股價有力再試次季高位，屬值博之選。

戰報

中能控股（00228）

志強上周三推介的中能控股，表現不俗，昨日高見0.55元，以推介當日低位0.49元計，累積升幅12.2%。

吉利汽車（00175）

錢進本月十三日推介吉利汽車，當日低位只有3.03元，昨日股價一度升上3.38元，升幅達11.5%。