本文重點
上海商業銀行喺金融海嘯前，買埋中環總行隔籬嗰幢大樓，依家嘅總部下年就開始拆，新大樓將會由名設計師嚴迅奇設計，五年之後完成，樓高28層。上商董事長榮智權（Lincoln）好風趣咁話，唔少得「跳下層」啦，因為14樓同24樓都唔會有。太子諗都啱嘅，始終中國人地方，做生意最怕唔吉利。
黃金地段 一半出租
中環甲廈供不應求，上商依家個總部未用盡地積比率，Lincoln話買埋隔籬大廈再起過，五年後先會起好，到時仲可以租番一半出去。點解咁捨得？佢話，新總部起好之後有成14萬方呎，地方闊落，依家中環租金貴，自己唔捨得用，會租一半出去，反而有部分辦公地方會搬去觀塘同尖沙咀等地方。
Lincoln回憶當時買嗰幢大樓之後冇幾耐，就發生金融海嘯，買完之後個價係咁跌，好彩依家升返晒，而且仲撞啱政府話將旁邊嘅西座政府大樓重建做新甲廈，更加帶旺嗰頭嘅物業。