美國經濟全球最大,相信好多股民同太子一樣,都想投資吓美股。滙豐尋日就推出全新「網上美股買賣服務」,畀客戶有多一個渠道投資美股。喺啟動儀式上,滙豐香港區個人理財業務主管麥倩華同滙豐亞太區個人理財業務財富管理業務區域主管李錦榮(Bruno)仲似模似樣地學足美股開市敲鐘三下,認真有諗頭!
即場示範買巴郡
佢哋用巴郡即席示範點樣透過滙豐「股票全速易」平台買入美股。如此安排,係因為巴郡乃全美國最貴嘅股份之一,買一股要成十幾萬美元,但滙豐都只係收18美元(約140.4港元)嘅經紀佣金,顯示佢哋嘅收費具競爭力咁話。