渣打暫無意搬總部

諗真啲，渣打嘅業務集中喺亞洲，管理層不時要英國、亞洲兩邊走，冼博德都話自己成日周圍飛，仲話有六成工作時間，穿梭於亞洲同中東之間。既然係咁，點解唔索性搬埋個總部去亞洲呢？冼博德就話家陣唔少營運工作已經放咗喺香港、新加坡等地，渣打總部現時就無計劃要搬。話雖如此，冼博德都補充話，如果喺英國嘅經營條件太惡劣，佢哋都要為股東着想，諗吓繼唔繼續駐紮英國。

至於《巴塞爾協定三》，冼博德就話不少細節仍未清晰，未來有大把工作要做，特別係保障銀行穩定之餘，又要保持效率，繼續推動經濟復甦。