今輪升浪，相信係由人民幣升值帶動，事關挨近年尾，班外資再沒有耐性，近日歐、美一唱一和，逼北京讓人民幣升值，市場預期年底前北京點都要做啲嘢，但係幅度幾多就有待觀察。
人民幣升值，唔少中資企業資產和利潤都水漲船高，港股估值可獲上調，成為推動大市上升嘅原動力，加上近半年內地決心調控樓市，令威脅經濟持續穩步增長嘅風險因素消除，外資對內地市場前景樂觀，近期港股成交增加，睇嚟今個末季股市有運行。
和黃有勢展升浪
藍籌股中，阿莊首推和黃，皆因一隻股要扭轉長期弱勢並唔容易，但今年和黃已明顯轉勢，相信接下來將會係一個長期升浪。
市況暢旺，近期又再出現新股熱潮，博士蛙（01698）、碧生源（00926）及微創醫療（00853）集資額雖然唔係話特別大，但認購反應都好踴躍，掛牌初期亦可留意炒作機會。
經濟前景改善，能源價格亦有望走高，能源股中，落後者可選中信資源（01205），其分拆錳業務一事有機會趕及年關前實現，近兩個多月股價反覆回升，短線若重上250日線，升勢可加快。
講開中信，其實同屬中信集團系公司中，有一隻較少人留意嘅股份，就係專做私募股權投資及基金管理嘅事安集團（00378）。過去公司已作出兩項環保業務投資，另外，從事一些短期投資或融資交易，包括上周宣布向一鐵礦提供5,000萬元貸款，嚟緊回報率都唔錯。呢隻股今年三、四月炒過一轉，依家又落番起步位，且看第四季有冇機會翻炒。
汽車股全面起動
講完隻冷門股，又睇番啲人頭湧湧嘅中資股。上周五汽車股表現唔錯，華晨（01114）股價再升8.37%，唔經唔覺去到4.66元；吉利（00175）亦唔輸蝕，升5.4%；比亞迪（01211）一洗頹風，急升10.7%，收報53.25元，唔排除圍繞汽車業又有新政策出台。
順勢而為，不妨留意天能動力（00819）。公司主要做應用電動自行車電池嘅鉛酸電池產品。近年積極開發純電動汽車電池產品，已基本實現商業化，小批量供應給奇瑞、上海汽車及眾泰汽車等車廠，今年中期該產品銷售額約4,300萬元人民幣，具發展潛力。
既然龍頭股比亞迪發力，短期環保汽車概念或可大炒一轉。天能勝在未曾開車，博中首站上望3.6元，穿3元止蝕。
戰報
大昌行（01828）
May於本月九日推介大昌行，當日低位只有7.04元，到上周五已創下7.8元高位，累積升幅10.7%。
神州數碼（00861）
阿莊上周三指神州數碼整裝待發，周五股價一度高見13.68元，較推介當日低位12.38元升10.5%。