其實，今個月表現唔係咁好，除咗係八月份政府措施嘅效應延續落嚟之外，亦都係六、七月「高峰」過後嘅必然現象，所以好多縱橫樓市多年嘅老手，都會從容面對，更加唔會趕住掟貨出街。

呇言瞉U減 代理叫苦

不過，成交銳減，代理嘅收入首當其衝受影響，自然係叫苦連天，依家惟有等發展商盡快開盤，希望喺新盤市場度搵食。事實上，嚟緊呢一兩個月嘅市場焦點，已經唔會再咁睇重喺賣地嗰度，正如Paul少之前幾個禮拜所講，賣地對市場嘅效應，已經唔可以好似六、七月嗰陣咁顯著。所以，呢排大家都會留意嘅，應該就係啲一手新盤，尤其係好幾個已經唱到行晒，話會喺短時間內推出嘅重磅樓盤，大家都想睇吓發展商經過咗八、九月呢一輪樓市低潮之後，銷售策略同埋開價會有乜變動。

貼市開價 營造氣勢

Paul少記得，好幾年前，樓市都有段停滯不前嘅時間。有發展商推出樓盤時，就大大聲咁講，話佢哋首批貨嘅開價係「啟動引擎」價，志在「一石激起千重浪」，撻番着個樓市咁話喎。當然，大家都明白，呢啲說話，有九成半都係啲Marketing嘅口號。如果開價唔能夠緊貼當時嘅市場環境，製造唔到市場氣氛，咁就算撻到電池「乾塘」，都唔會撻得着個市嘅。不過，對於好似依家呢一類市況，又確實需要有啲big issue出嚟「啟動引擎」嘅，或者正確啲講，係需要為十里雲霧中嘅樓市，帶嚟較為明確嘅方向。

所以，嚟緊呢兩個月嘅新樓盤，都可謂「任重道遠」，事關發展商會唔會繼續開高價，貴絕全區咁賣，定係會為求造勢去貨而開價「鬆手」啲，都反映緊發展商對後市嘅諗法；而開價之後嘅銷售成績，則顯示出市場所能夠承受嘅水位究竟去到邊。

不過，大家亦唔好一本通書睇到老。因為賣樓始終都係商業行為，發展商要「試水溫」之餘，其實亦都要睇吓自己急唔急住套現，從而去安排最合自己嘅銷售安排，絕對唔會為咗幫大家去睇清市況而開價。另外，依家市場上每個樓盤嘅銷售對象都好唔同，尤其多咗一大班疊水嘅內地同胞，情況就變得複雜，因為班內地同胞買樓係好注重發展商品牌，有啲樓盤講到自己幾好都吸引唔到佢哋，但係有啲就無端端都會賣到「一屋內地客」。所以，大家喺衡量新盤市況嘅同時，亦都要考慮到個別樓盤嘅接貨買家類別，咁樣睇市就會睇得更加清晰。