全國最大電器分銷商之一的國美電器（00493），董事局近期出現大地震，始創人兼大股東黃光裕同現任主席陳曉之間展開股權爭奪戰，雙方已經就事件作出咗相應嘅部署，等待九月廿八日舉行股東特別大會，為整件事做一個了斷。黃生勝出嘅話，可能要將佢自己私人擁有嘅400幾間分店注入上市公司之中，來換取更多嘅股權。咁樣，國美嘅上市公司將可以得到一個更為「升呢」嘅銷售網絡。如果股權爭鬥觸發全面收購的話，投資者甚至有可能以高價出售手中持有嘅國美股份。
國美最近就同南韓三星電子簽署價值300億元人民幣嘅兩年期銷售合作協議，展開涵蓋唔同類型全線家電產品合作，規模之大盡顯行業一哥風範。講到底，國美喺內地所擁有嘅龐大銷售網絡，唔係人哋一朝一夕可以追得到，只要管理層風波一旦平息，公司就可以繼續發揮規模優勢，盡享呢個全球最多消費者嘅市場商機。