昨日花了一定篇幅分析嘅電力股，果然有異動，其中提及嘅華潤電力（00836）升2.38%，收報17.2元，成交2.59億元；其他電力股如大唐發電（00991）、華能國際（00902）、中國電力（02380）升幅介乎3.89至6.67%。
濠賭股博亂炒一轉
呢期資金興翻炒落後股，中資股中，電力股有異動，而細價股則見濠江股異軍突起，昨日位居升幅榜首嘅奧馬仕（00959），一係唔升，一升就一倍有多，收報0.174元，成交2.86億元。實德環球（00487）及黃金集團（01031）亦都係好耐未見活躍嘅股仔，昨日分別升11.8%及9.3%。
老實講，內地兩個長假將至，節日旅遊消費帶動濠江市況，年年都差唔多，唔見得啲細價股基本因素有乜大變化，相信都係班炒家炒到冇嘢好炒，就向低迷已久嘅股仔落手，趁「黃金周」概念渾水摸魚，但音樂椅遊戲嘅音樂唔知幾時停，參加者惟有自求多福！
唔經唔覺，一年又過咗接近九個月，由去年第四季至今，港股都係停留喺上落市階段，但今年第三季有改善迹象，事關底部支持上移了，而大型企業公布嘅業績理想，亦為市底帶來支持，末季打破悶局嘅機會不能完全抹煞。
至於個股方面，由於唔少中資股估值已去到一個不便宜嘅水平，迫使部分資金從其他板塊發掘新對象，節能環保、旅遊及文化產業等新興概念板塊，嚟緊表現有望跑贏大市。
上半年業績有起色
近年兩岸經濟加強互動，亦提供一個炒作概念。台資銀行股富邦銀行（00636）今年上半年業績有起色，純利同比增長逾五成，一來經營環境已回穩，二來受惠入股一年嘅廈門商銀利潤貢獻明顯增加。下半年公司將把焦點放喺擴大貸款規模，以抵銷同業競爭激烈及超低息環境持續嘅負面影響。
隨着兩岸經貿活動愈趨頻繁，金融服務需求亦增加，但限於種種原因，靠兩岸當局推動，政策和時間都未必能滿足市場需求，所以香港仍有特殊優勢，富邦作為母公司進入內地市場嘅橋樑，未來可繼續發揮積極作用。
再論估值，富邦現價市帳率0.9倍，低迷皆因有待年度盈利及派息恢復。富邦股價自五月以來反覆回升，已重上50日及250日線，正挨近今年以來嘅阻力位3.86元，適逢十月可視為兩岸嘅「政策月」，可留意是否有消息配合作出突破。
戰報
森源鈦礦（00353）
志強尋日推介的森源鈦礦，早段試咗0.113元低位後，股價迅即上揚，並高見0.128元，單日升幅達13%。
+13%
申銀萬國（00218）
錢進本月七日推介的申銀萬國，昨日逆市做好，並一度升上3.45元，較推介當日低位3.2元累升7.8%。
+7.8%