本文重點
香港證券專業學會每年都會頒授榮譽會員資格，表揚對香港金融服務行業發展有貢獻嘅人士，今年獲得最高殊榮嘅係聯交所前主席鄭維健。證券專業學會將於十月十四日嘅秋季晚宴，正式頒授呢個殊榮畀鄭維健。
鄭維健除咗係聯交所嘅前主席，亦係可持續發展委員會前主席，近年佢較為低調，不過今年六月，鄭維健喺報章撰文，大談香港喺人民幣國際化嘅機遇。
大談人幣國際化
佢認為，回顧香港金融業逾一百年歷史，九十年代出現咗一個轉捩點，九三年國企開始來港上市，至今發展成香港金融市場很重要的一環。依家中國推動人民幣國際化，香港作為人民幣離岸中心，將肩負另一個歷史任務，相信未來將引領香港金融業登上另一高峰。
講番呢個被譽為「終身成就獎」嘅榮譽會員資格，過去已有多位人士取得，全部都係猛人，包括李業廣、利國偉、鍾悟思及梁定邦等，去年取得呢個殊榮嘅係已退休嘅港交所（00388）前行政總裁周文耀。