「賓架」同「芬佬」日日喺股場上鬥個你死我活，依家可以嚟個公開「隻揪」，其實係為咗個慈善拳擊比賽。今年第四屆嘅「對沖基金拳擊之夜」邀請香港金融界包括銀行家和對沖基金經理參加，初賽有超過40人，入圍嘅有20個精英，當中兩位係華人。
訓練五個月打拳賽
尋日太子傳媒老友去咗訓練中心，見到個個咁大隻忍唔住「嘩」一聲，但背後全部係血和汗，佢哋要進行五個月嘅地獄式訓練，每星期練習兩日。拳擊手之一Erste Group Bank副總裁王一鳴話：「平日落盤交易工作緊張，放工專注打拳就可以紓緩壓力，訓練過程好易受傷，試過被對手打到塊面，開唔到口食飯，依家都會控制飲食，保持最佳狀態，喺擂台上打贏對手。」
目標籌募百萬善款
搞手IME行政總裁Rob Derry指，決勝負定喺十月二十八日，預料吸引800至1,000人觀賽，目標籌100萬元善款，為「微笑行動」及「奮進行動」籌募經費。