零售股果然喺中秋節假前一周翻炒，堡獅龍（00592）、慕詩（00130）、威高（01173）升幅介乎6.6至9.6%。內地體育用品股則未見熱身，反而細價消費股起動，中國七星（00245）升7.75%，成交量逾兩億股。此外，家電股威靈（00382）升8.57%，而時值多事之秋嘅國美電器（00493）亦升6.3%。
另外，同獲國策護蔭嘅汽車股亦未見有太大獲利回吐壓力，華晨中國（01114）昨日再創五十二周新高4.59元，收報4.48元。呢隻股阿莊喺七月中旬曾作推介，當時股價才兩個幾，事實係其時有上海表叔報料，話呢隻股要全速前進，點知自己一直冇行動，結果睇住隻股衝完3蚊衝4蚊，如入無人之境。
潤燃集資強化實力
華潤燃氣（01193）昨日停牌，等候發表配股集資通告，據聞集資額約25億元，用作收購母公司城市天然氣分銷業務。今年上半年，該股純利同比增長75%至3.05億元，經營表現理想，相信配股反應唔錯。今年以來，其股價一直受制於12元關，由於注資後盈利能力增強，若今次配股復牌後股價穩守10元關，可以睇位跟進。
話咁快又即將踏入第四季，市場對於人民幣升值嘅憧憬升溫，大戶密密收集航空股，東航（00670）、國航（00753）及南航（01055）升幅介乎1.15至3.29%，成交均逾億元。
具人民幣升值概念
其實，人民幣升值概念股何其多，其中一隻係神州數碼（00861）。神數主要從事分銷IT及系統產品、提供供應鏈服務及IT服務業務，早幾年人民幣升值速度較快，神數亦受益不淺，○六/○七年度及○七/○八年度嘅匯兌收益分別為1.09億元及2.93億元。
除咗睇人民幣因素外，近年神數核心業務盈利能力亦明顯增加。截至今年六月底止首財季，公司純利達2.9億元，同比增長10%，其中PC伺服器及消費類IT產品營業額同比增幅分別達到65%及54%。公司已着手拓展包括iPhone、iPad、平板電腦以及智慧手機和電子書等多種智慧型終端設備經營權，加上毛利率較高嘅服務業務保持增長，現價估值唔係貴。阿莊估計，年底前神數可落實收購軟件項目，而踏入明年，分拆IT服務業務喺內地上市嘅計劃進度亦會明朗化。再看今年首季有股東配售舊股，基金接貨價係每股13元水平，現價較之低，而過去三個月其股價已喺11至12元建立支持區，250日線亦已上移至11.25元，整裝待發，睇睇會否喺年尾標會！
戰報
新奧燃氣（02688）
史提芬上周一指新奧燃氣中長線諗得過，當日低位20.85元，昨日升至23.35元，累積升幅11.9%。
+11.9%
波司登（03998）
冼金基本月六日推介波司登，當日低位2.61元，昨日股價一度升上3.07元，升幅達17%。
+17%