中秋節就快到，太子有好多財金界朋友都話會出外旅遊過節，皆因請一日假就可以去足四日，認真划算。太子其中一位老友恒豐證券董事長張華峰，仲相當為員工着想，出埋錢畀夥計旅行。
上海南京玩足四日
張華峰為人一向豪爽，佢會出錢請晒全公司嘅員工去南京同埋上海，實行玩足四日三夜。
賓主講笑關係融洽
嘩，機票連食宿全包，呢個老闆認真係唔話得，如果佢請埋太子去就好啦。
眾所周知，張老闆喺九五年已經睇中南京嘅發展潛力，於是喺當地買入地皮，興建地產項目，難怪恒豐證券研究部董事林家亨（Simon）同太子講：「我哋今次會先去南京睇老闆嘅豪宅，之後再去參觀上海世博。」點知Simon竟然畀張老闆潑冷水，反話佢：「亂咁講嘢，咩都講得出口。」哈哈，太子見到佢哋成日講笑，可見二人賓主關係十分融洽。