磚頭價格唔受控制，其實唔係香港獨有，雖然歐洲經濟一塌糊塗，早前英國倫敦超級公寓海德公園一號（One Hyde Park），一個頂層複式單位成交價1.35億英鎊（約16.1億港元），呎價7.4萬港元，基於英國經濟仲係相當疲弱，且未見復甦勢頭，交易令唔少人跌眼鏡，估唔到，幾星期後又再有豪宅破紀錄，傳統歐洲超級富豪聚居地摩納哥，一個名為La Belle Epoque的頂層複式單位，以2.4億歐元（約23.63億港元）成交，呎價13.6萬港元，改寫環球豪宅及凶宅成交紀錄（前手屋主十一年前在屋內被燒死）。
明顯地，今日美歐日三大中央銀行，都唔想見到經濟增長太疲弱，於是狂印銀紙，結果流動性過剩的問題變咗我哋未來最大嘅挑戰。對於股市投資者來說，最值得關注係熱錢幾時方肯放棄避險，由實物及債券市場回流番去股票市場，史提芬估計我哋離呢一日，應該不遠矣。
升勢獲大成交配合
上星期六，國家統計局公布八月內地通脹3.5%，大員仲暗示內地通脹有短期見頂可能，分析員估計，人行未來三至六個月內加息機會唔大，上星期悶足五日的港股，一次過追補升幅，恒指升400點，報21,658點，即月期指低水變番高水，收21,720點，大市成交800億，唔計上周中移（00941）配股上板，係接近兩個半月來的最大成交，升勢算係有大成交配合，短期應該仲有水位可升。
另外，人行公布八月新增貸款5,452億元人民幣，比七月多124億元人民幣，高過市場估計，主要是商品銷售及按揭貸款需求增加，分析員預測，一○年餘下幾個月，因應經濟下行風險增加，人行新增貸款會稍為放寬，相信有利A股氣氛。
iPhone確係魅力沒法擋，內地又傳聯通（00762）短期內推出iPhone 4手機上市，刺激股價升0.44元，報11.98元，創今年新高。
早前聯通中期業績，開始見到發展3G所帶來的好處，雖然推廣開支唔細，例如上半年的3G手機補貼11.7億元（人民幣．下同），銷售及市場推廣開支花了22.94億元，相當於3G服務收入五成七，但相比起2G用戶每月每戶平均消費（ARPU）跌4.6%至39.8元，3G的ARPU罕有地止跌，維持139元水平。心水清的讀者可能即刻睇到，用戶都係用一部手機，3G卻比2G用戶平均多付出2.5倍的月費，對於電訊商，設備成本已經固定，頻寬成本增加幅度也一定不及2.5倍，當3G普及率上升，內地3G電訊商可謂前途無限。目前，聯通有2G客1.5億，剛起步的3G，客路不過850萬，比例是17.6比1。
國產手機滲透率增
上星期，內地三大電訊設備供應商之一華為推出2,000元樓下、相當流行的Android作業系統手機，一哥聯想（00992）亦不甘後人，研發自家系統的智能手機應市，可以想像，三兩年後，國產3G手機的滲透率只會有增無減，與來路貨比較，最大分別在於價錢，大氣候底下，最有利的還是電訊商，在補貼上可以省下一大筆。