本文重點
內地體育用品競爭激烈，宣傳策略愈來愈重要，好似李寧早前（02331）換上新LOGO，又搵咗多名體育明星做代言人，今次輪到佢嘅對手匹克（01968），不過佢哋唔係轉LOGO，而係由籃球市場發展至網球市場，第一步就係簽咗網球女明星奧爾加．格沃特索娃（Olga Govortsova）做代言人，與國際女子職業網球巡迴賽（WTA）簽約，成為亞太區嘅贊助商。
簽女球星做代言人
匹克為咗喺競爭激烈嘅情況下突圍而出，公司今次有新突破，進軍網球用品市場，佢簽咗格沃特索娃成為首位網球代言人，而且同WTA合作生產網球產品，喺全國嘅匹克店舖都有得賣。
匹克嘅首席執行官許志華話，匹克喺籃球市場已有知名度，係時候進軍另一個市場，睇好中國嘅網球市場，發展潛力大，有助公司國際化同專業化。