本文重點
iPhone 4推出至今只係個幾月，已經旋風式俘虜咗唔少人嘅心，幕後功臣唔少得富士康（02038），因為郭台銘揼本喺日本買咗1,000部機器，專門用嚟製造金屬手機殼，可想而知郭總對iPhone 4幾咁重視。
辦公室搞掂三餐
太子聽講郭總嗰排日日做十六個鐘，一日三餐都喺辦公枱上面搞掂，好似染髮呢啲私人事都要等到夜晚十一點先有時間去整，難怪有句傳聞話「如果沒有郭台銘，就沒有喬布斯的今天」，依家深圳廠房每分鐘就製造出90部iPhone 4，真係犀利！
就係郭總嘅遠見同毅力，成就出今日嘅「電子王國」鴻海集團。當年只有二十三歲嘅郭台銘，問阿媽借咗7,500美元，租咗間舊屋開始做黑白電視嘅頻道轉換接鈕。八十年代時，佢足足喺IBM出面等咗三日，再加上佢嘅口才成功得到IBM生意，所以唔少人都好佩服佢嘅熱誠同毅力。