本文重點
證券商協會永遠名譽會長蔡陳葆心早排唔喺香港，放咗差不多成一個月假，原來佢四圍飛，周遊列國，佢去嘅地方遠至美國，近至丹霞山，真係足迹遍天下。眾所周知，佢有屋企人喺美國，今次去美國亦主要係探孫，喺美國住咗成兩個禮拜。內地佢亦去咗不少地方，好似貴陽、韶關同丹霞山咁。太子記得，冇幾耐前上海世博剛開幕，佢亦率先去咗參觀，佢唔單止足迹遍天下，簡直係精力充沛！
知足常樂享天倫
咁蔡太唔喺香港咁耐，豈非做少咗好多生意？大家都知，經紀分分鐘都係錢！蔡太氣定神閒，坦言依家到咗佢咁嘅年紀，早已過咗搵錢嘅黃金時間，搵錢都喺二十年前啦。依家知足常樂，錢夠使就可以，現時最重要係可以同一家人團聚，享受親情。佢有時候仲會親自下廚，整番幾味招呼吓啲朋友上嚟屋企坐吓傾吓偈，佢覺得亦係人生樂事呢。
親情友情重要之餘，佢話，如果自己精神許可，佢覺得應該仍然可以做吓公職，回饋社會。唔怪得近日業界熱烈討論嘅延長港股交易時間，佢都有份向行家收集意見，向港交所（00388）行政總裁李小加反映呢。