內地A股市場將於下周三起中秋節放假，本月廿七日復市。而「十．一」長假會放到十月八日才復市。阿莊相信，若長假前滬綜指能確認衝穿2,700點，將可為假期消費市道營造有利氣氛，本周起又可以重點關注內地消費品股。在旅遊股中，阿莊心頭好依然係手持的錦江酒店（02006），體育用品及食品股則可分別睇實安踏（02020）及旺旺（00151）。至於本港的零售股，由於呢個月以來經已炒咗一大浸，若然頭也不回再飆，有貨應該諗落車計數袋袋平安。
中移不利因素漸消
港股方面，恒指上周在250日線（21,073點）樓上收市，本周走勢較為關鍵，若能企穩21,000點水平，則向上衝橫行區阻力位21,800至22,000點的機會增加。上周中移（00941）因VOD出售持股消息，股價回落至250日線76.5元水平，但其實此舉反可去除困擾其股價走勢的不明朗因素，若月內能重上80元，唔怕落場追貨。
中國通信服務（00552）今年上半年純利9.06億元（人民幣．下同），同比增長19.4%；毛利率及淨利潤率同比大致持平，分別為15.5%及4.2%。阿莊喺七月中旬曾推介中通服，指呢隻股穩穩陣陣，最啱價值投資者，當時股價約3.86元。結果公司交得出成績，股價上升，上周五曾高見4.3元，收報4.29元。
其實，從龍頭電訊設備股中興通訊（00763）中期純利增幅僅12%可見，3G投資高峰過後，今年以來電訊營運商減少資本投資，電訊設備生產商嘅業務增長明顯放緩。相比之下，中通服能維持增長步伐，主要原因係公司及時拓展電訊基建服務以外嘅業務，並透過優化客戶結構，抵銷電訊營運商資本開支減少嘅負面影響。
三網融合添新商機
期內，公司來自政企客戶嘅收入同比快速增長54.2%，而透過承接電力、地鐵、亞運會等大型通訊和配套訊息化項目，亦有助提升品牌影響力，同時海外收入同比增長84.5%至10.98億元。
展望未來，「三網融合」將為中通服提供一個新嘅增長平台，其中廣電企業有望發展成電訊營運商級別嘅客戶。為此，公司已喺部分試點省份成立項目團隊，跟蹤廣電網絡雙向改造及電訊營運商寬帶網絡提速等最新情況。
阿莊相信，今次中期業績足以叫投行上調其估值，嚟緊盈利和派息都有條件保持穩定增長，可繼續視之為1隻攻守兼備嘅實力股。以今年預測市盈率十五倍計算，合理價5.25元，打個九折都值4.7元，主要支持位喺3.8元水平。
戰報
海爾電器（01169）
史提芬上周三指海爾電器具炒落後條件，當日低位5.45元，上周五股價高見6元，累積升幅10%。
國泰君安（01788）
積奇上周二指國泰君安借勢炒作，上周五一度高見4.44元，較推介當日低位3.89元升14%。