講開「觀望」，其實近排除咗本地用家同埋投資者趨於觀望之外，內地同胞嘅水源，亦都放慢咗好多。Paul少同「老死」周區董（留意！係周區董，唔係周董，雖然佢兩個都真係有幾分相似）傾開偈，佢都話旗下同事跟開嗰班「表兄」，近排經常都借故推搪，唔肯出嚟睇貨；就算話畀佢哋聽有平貨執，佢哋都係半信半疑咁。

嚮往本港自由市場

其實，呢啲正正就係反映緊，內地人對近排樓市走勢嘅憂慮，絕對唔比本地用家細。呢啲亦都係Paul少所講，內地同胞是否可以長期支撐樓市嘅「變數」。

內地人近年嚟香港買樓投資成風，除咗係因為佢哋夠「疊水」，要搵地方「排洪」之外，更重要係佢哋對自由市場嘅嚮往。佢哋都係相信香港係一個奉行自由市場經濟嘅社會，而唔係好似內地咁，吓吓都用政策調控樓價或者係樓市嘅熱度。

但係依家香港政府喺咁短時間內兩次出手搞搞震，雖然實際所做嘅措施，對樓市唔會帶嚟結構性嘅轉變，但係正所謂「一不離二，二不離三」，已經冇人可以保證唔會再有下一次「出招」。咁樣就會令班內地同胞覺得，香港政府對待樓市嘅方式，愈嚟愈有阿爺之風，對於香港樓市嘅熱衷程度亦可能會慢慢減退。

單靠「本土力量」難撐

近排，仲傳出唔畀人用買樓作投資移民，咁就更加令人以為，仲會有好多政策，衝住班內地客而嚟。

Paul少覺得，如果政府出招係建基於市民大眾切身利益嘅話，咁就無可厚非，但係觀乎依家推出嘅措施，根本只係為咗畀人鬧少啲，做吓樣搞吓事咁，結果反而令到外資同埋內地資金都對樓市失咗信心，咁就真係無謂至極。

況且，其實大家都要接受一個現實，就係當香港同祖國嘅關係愈嚟愈密切嘅時候，我哋可以享受到好多好處，但同時間亦都要有trade-off。即係咁，呢幾年，內地人湧到落嚟購物，令到好多行業都興旺；但係同時間，我哋想去買呢啲嘢嘅時候，就會發覺樣樣都已經貴晒。

喺樓市裏面，依家亦都或多或少都有呢種情況。姑勿論點都好，事情都唔會返得到轉頭，即係大家都唔會，亦都唔應該期望內地資金大規模咁撤出樓市，或者係內地人買樓嘅比例，會重返○五、○六年嘅水平。老實講，如果失去內地同胞嘅支持，單靠「本土力量」，樓價根本冇可能企得穩喺依家個位，到時只會係一輪急遽波動，所產生嘅民生問題，又何止依家所出現嘅咁簡單呢？