本文重點
近排中資投行一哥中金飽受人才流失之苦，除咗首席經濟學家哈繼銘過檔高盛做投資銀行部董事總經理之外，原來呢幾個月，大大話話有成三十幾個高級僱員被外資投行撬走，搞到中金總裁朱雲來頭都痕埋。之不過，有市場消息話，原來引發呢場跳槽潮嘅主因，係中金允許員工將所持嘅中金「虛擬股權」套現，大大降低咗蟬過別枝嘅成本。
「虛擬股權」套現累事
虛擬股權通常係企業對中、高級管理人員授予嘅激勵機制，員工可以享受分紅，但係冇所有權同表決權，一般都唔可以轉讓或者出售，仲會喺離開公司時自動失效。有消息透露，中金嘅「虛擬股權」薪酬體系，所涉股權高達公司總價值嘅兩成，依家中金允許部分員工將所持虛擬股權套現，令到佢哋就算另謀高就都唔使放棄太多嘢。