中國成為全球經濟嘅指標一日比一日明顯，近期人債全面喺香港登陸。隨住「十．一」逼近，政策市概念正式啟動，人債又全面發售，加上金管局「審時度勢」咁配合，簡直係「火上加油」，又再炒一轉。
喺阿爺做最強後盾之下，似乎人債會帶動一股新嘅旋風，加上人仔升值「雙龍出海」，睇怕一眾內地錢莊又會有樣學樣，齊齊喝采。記得教書嘅時候，都有教過一個分析架構叫「PEST」，唔好以為全部都係均等啊！只要個P：Political（政策）有動作，其他E：Economical（經濟）、S：Social（社會）加埋T：Technological（科技）即刻提升。仲使講嘅，政策喺中國梗係最大啦！
如果人債旋風式襲港，咁真係要留意吓中銀香港（02388），皆因佢分行多，既係人債大拆家，又係人民幣結算大佬，除非人仔唔得，否則，中銀香港實得。