中移股價仲未止跌，除息下收報77.45元，成為A股外另一阻礙大市回升的攔路虎。今次Vodafone減持中移事件中，相信好多人會諗一個問題，到底一個有離心策略股東揸住6.42億股，抑或分散畀幾十個基金經理持有，對股價會相對有利？筆者主觀意見認為，如果中移仲係上市初期，有一間名氣大的策略股東揸重貨，在業務發展到減少街外流通量方面都有利，但今時今日，世界流動網絡一哥中移，總客量比Vodafone還要多，而且佔指數比重大的關係，幾乎個個基金都要捧場揸番多少倉底，其實Vodafone沽咗反而掃除一直擔心沽貨套現的陰霾。不過，短期新增貨源實在唔少，需要時間消化，尤其係衍生工具聯繫的沽盤，不過整固之後，相信中移股價會有快速反彈。觀乎昨日不少認購證價格唔跌甚至倒升，可見窩輪發行商都有類似睇法。
消費信心攀上高峰
業績期過咗，近日市場無消息可炒，零售股成為一路奇兵，先施（00244）、景福（00280）、漢登（00448）、堡獅龍（00592）、JOYCE（00647），甚至億鑽珠寶（00475），通通由冰箱放入微波爐叮到熱辣辣。如果看官們唔係宅男宅女一族，都應該留意到零售市道的興旺程度，可以說是沙士後一個高峰，好一點的餐廳，都需要早一兩星期留枱。說穿了，即使今時今日大部分打工仔收入無大改善，但單係樓市向好，已令唔少有資產在手的市民心理上富有咗，大大推動消費信心。
早輪業績期，記得珠寶商周生生（00116）對分析員提過，香港的同店銷售增長尤勝內地，當時吸引到筆者注意，只係想唔到熱錢炒得咁偏鋒，連平日成交十萬八萬蚊的，都變成球來球往的熱炒股，留意到這類暴動股的共通點，大部分不是估值偏低，就係股價較資產折讓頗大，更重要是，股東名冊中，極少見基金股東沾手，貨疏之下，一掃股價輕易翻一番。
市場大玩尋寶遊戲
本來筆者極少玩這類尋寶遊戲，但見市況悶悶哋，大大聲細細注其實無傷大雅，有兩隻無乜炒過嘅心水股，包括收購咗金至尊珠寶、預期市盈率大約十至十一倍的香港資源（02882），另一隻係早前出中期業績唔錯，內地同胞的至愛品牌金利來（00533）。
金利來上半年銷售額升3%，但純利1.61億元，比去年同期大升三成六，下半年一般是時裝零售銷售旺季，保守一點，全年估計賺3.3億至3.5億，以目前30.8億元市值計，市盈率最多都係9.3倍，仲係相當落後。但緊記，炒風一過，這類股票成交可以相當稀疏，肯定唔係瞓身豪賭對象。